Vendlindja ime: Dakari i Sarah Diouf

Në artikullin e parë të serisë sonë të re, ku stilistët nga e gjithë bota ofrojnë ide se çfarë të bëni, ku të shkoni dhe çfarë të shihni në qytetin e tyre të lindjes, dizajnuesja dhe themeluesja e markës së modës “Tongoro” i bën homazhe kryeqytetit të Senegalit

“E njihni atë ndjesi kur e dini se i përkisni një vendi të caktuar?” Kështu e përshkruan Sarah Diouf qytetin e saj, Dakarin. Dashuria për këtë vend ka lindur që në fëmijëri. Ajo lindi në Paris nga prindër gjysmë senegalezë dhe vitet e para i kaloi në Bregun e Fildishtë. “Vija shpesh këtu me prindërit e mi, por nuk kam qëndruar kurrë për një kohë të gjata”, shpjegon Diouf. Në vitin 2001 ajo u largua nga Bregu i Fildishtë dhe u kthye në Paris për të studiuar dhe më pas për të punuar si stiliste dhe redaktore. “Një nga miqtë e mi më të mirë, që e takova në shkollën e biznesit në Paris, është 100% senegalez. Në vitin 2013, kur u kthye për të jetuar në Dakar, shkova për ta vizituar dhe kjo ishte hera e parë që vizitoja qytetin jo me syrin e turistit. Këto ishin tri javët më të pabesueshme të jetës sime”. Vitin pasues edhe ajo u transferua në Dakar, por ishte kjo përvojë që e nxiti të krijonte markën e saj Tongoro. 

“Perceptimi global i produkteve afrikane ka qenë shumë negativ për një kohë shumë të gjatë. Doja të ndihmoja që ta ndryshoja këtë. Kështu, ndërsa isha ende në Paris, fillova të eksperimentoja me pëlhura dhe gjeta rrobaqepës nga Dakari për të më qepur veshjet”. Gjatë Javës së Modës në Paris, veshjet e saj u vunë re nga fotografë, redaktorë dhe miq të stilit të rrugës, “si dhe nga miqtë e miqve të miqve”, thotë ajo duke qeshur. Shumë njerëz filluan t’i kërkonin të qepte veshje për ta dhe kjo solli lançimin e “Tongoro” në vitin 2016. Nga prokurimi i materialeve deri te krijimi aktual i veshjeve, gjithçka ndodh në qytetin senegalez. (Që atëherë, Tongoro është zbuluar dhe veshur nga shumë të famshëm, duke përfshirë Beyoncé, Alicia Keys dhe Burna Boy). 

Së fundmi, edhe vetë Dakari ka patur një moment të lavdishëm kur emrat e mëdhenj të modës dhe argëtimit shkuan atje për një shfaqje prestigjioze të Chanel. Por pavarësisht kësaj, dashuria e vazhdueshme e Diouf për qytetin e saj shkon përtej popullaritetit të tij aktual në botën e modës. “Dakari është një vend i jashtëzakonshëm. Secili prej nesh mbërrin në një moment në jetën e vet ku kërkon një lloj përvoje të qetësisë mendore, fizike dhe shpirtërore. Për mua Dakari është vendi ideal. Është aq i qetë, pothuajse gjithmonë me diell dhe i rrethuar nga deti. Është kryesisht një vend mysliman, por të gjithë jetojnë në paqe me njëri-tjetrin; dhe pavarësisht festave të ndryshme fetare pashkët dhe bajrami festohen nga të gjithë. Kjo është një gjë kaq e bukur për mua”. 

Pavarësisht se është rritur në një shtet tjetër afrikan, kjo është arsyeja pse ajo nuk ka asnjë dyshim për rrënjët e saj senegaleze. “Mbiemri im është Diouf, [shumë i përhapur në Senegal] dhe shikomë”, shton ajo duke qeshur, “A nuk dukem si grua senegaleze?!”. Gjithashtu, nuk ka se si të kem fëmijë dhe të mos kridhem plotësisht në trashëgiminë time kulturore. “Pra”, flet ajo e vendosur, “ndonëse jam rritur në Bregun e Fildishtë, unë i përkas Dakarit”.

Rekomandimet kryesore të Sarah Diouf për të vizituar Dakarin...

1. Më pëlqejnë veprat e piktorit dhe të skulptorit Alioune Diouf. Veprat e tij mund t’i shihni në galerinë Selebe Yoon. Është një nga vendet e mia të preferuara të artit. 
2. Seku Bi është një ndërtesë e lashtë që pronari e ka shndërruar në një hotel butik, e cila është me pamje spektakolare nga deti, dhe me një menu të mrekullueshme. 
3. Copacabana Surf Village është vendi i përsosur për të bërë sërf, për të ngrënë dhe për t’u çlodhur. Plazhi është i mrekullueshëm dhe atmosfera është e këndshme. 
4. Provoni Thieboudienne, një pjatë tradicionale me peshk, oriz dhe salcë domateje. Vendi për të shijuar këtë është një restorant modest në qendër të qytetit i quajtur Chez Loutcha. Ata përgatitin pjatën më të mirë. 
5. Nuk mund të largoheni nga Dakari pa vizituar tregjet. Një nga më të njohurit është ai i Sandagës, ku mund të blini pëlhura që mund t’i çoni te një rrobaqepës i cili do të qepë diçka shumë tradicionale për pak para. Mund të gjeni edhe bizhuteri të mrekullueshme me çmim të lirë që mund t’i personalizoni dhe t’i vlerësoni për gjithë jetën.