Trendet e reja të enologjisë: si gratë me ngjyrë po ndryshojnë industrinë e verës
Në vitin 2012, Somm, një dokumentar që flet për katër individë në përpjekje për të kaluar provimin tepër të vështirë të master sommelier, hodhi dritë mbi botën ekskluzive të somelierëve; ekspertët më të mirë të verës dhe çiftëzimin e saj me ushqimet. Kjo botë ka qenë e dominuar nga meshkujt e bardhë, por tani, më shumë se 10 vjet më vonë, ky profesion është përqafuar nga njerëz të etnive dhe prejardhjeve të ndryshme. Në krye të ndryshimit janë, ndër të tjera, somelieret me ngjyrë si Tonya Pitts, menaxhere e verërave në restorantin One Market në San Francisko dhe Larissa Dubose, menaxhere e pijeve për shitësin amerikan me pakicë Paradies Lagardère.
Duke i hedhur një vështrim artikullit The Future 40 Tastemakers and Innovators of 2022 të revistës Wine Enthusiast, hasim në një profil të larmishëm për sa i përket përkatësisë etnike, shprehjes gjinore dhe moshës. Është një dinamikë që e mirëpresim, por që është ende në fillimet e saj. Sipas shërbimit virtual të punësimit Zippia, 68% e somelierëve janë meshkuj, nga të cilët vetëm 11% me ngjyrë.
Dubose ia atribuon këtë mungesë historike të diversitetit një sërë faktorëve gjeografikë, financiarë dhe socialë. “Mendoni për origjinën e verës”, shpjegon ajo. “Pija e perëndive daton që nga koha e romakëve, nëse jo më herët, dhe për një kohë të gjatë prodhohej vetëm në Francë, Itali dhe Spanjë”. Dubose gjithashtu thekson se ajo, ashtu si vajzat e tjera të reja afro-amerikane, ka patur përvojë disi të kufizuar me verën kur ishte fëmijë. “Nëse ndonjëherë ka patur verë në komunitetin tonë, ndoshta ka qenë në kuti kartoni dhe quhej Riunite”, thotë ajo me të qeshur. Prandaj, rruga e saj drejt këtij profesioni 13 vjet më parë ishte e gjatë e me tatëpjeta. Në fakt, ajo filloi si përfaqësuese e shitjeve farmaceutike për të kaluar më pas në rolin e banakieres dhe shpërndarëses së verës, duke u certifikuar përfundimisht si someliere.
Të jesh ekspert i verërave, shpjegon Dubose, “është një hobi që kërkon kohë dhe para. Fuqia blerëse e afro-amerikanëve vlerësohet të jetë rreth 1.6 trilionë dollarë, kështu që neve nuk na mungon paraja, por nuk kemi pasur gjithmonë qasje të lirë”. Pitts, e vlerësuar si Somelierja e vitit 2022 nga Wine Enthusiast, shton: “Fillimisht, certifikatat e somelierëve ishin diçka evropianë, jo amerikane”, që ndoshta ka kontribuar edhe në mungesën e diversitetit në profesion. Ndërsa të dyja gratë bien dakord se nuk është thelbësore të pajisesh me certifikatën e somelierit, pasi aftësitë e nevojshme fitohen me kalimin e viteve të punës, ajo mund të ndihmojë. “Pajisja me certifikatë mundëson që gratë dhe njerëzit e tjerë me ngjyrë të merren në konsideratë dhe të kenë më shumë mundësi”, shpjegon Dubose.
Për të shtuar diversitetin, si Pitts ashtu edhe Dubose argumentojnë se mentorimi është thelbësor. Julia Coney, diçka si një legjendë në botën e someliereve me ngjyrë, këshilloi Dubose në fillim të karrierës së saj. Coney është e njohur për një letër të hapur drejtuar shkrimtares së verërave Karen MacNeil, në të cilën ajo përshkroi vështirësitë e të qenit jo vetëm një someliere, por edhe me ngjyrë. “Tani unë insistoj që gjithmonë të kem pranë meje një tjetër profesioniste të re me ngjyrë”, thotë Dubose.
Pitts argumenton se kjo filozofi është thelbësore për ndryshimin. “Kur fillova 30 vjet më parë, nuk shihje femra ose njerëz të tjerë me ngjyrë në ambientet e restoranteve. Zakonisht njerëzit me ngjyrë punonin në prapaskenë, pastronin tryezat, gatuanin ose lanin enët”. Kjo është arsyeja pse Pitts është e përkushtuar të edukojë njerëzit e çdo etnie, moshe ose gjinie, të interesuar për t’u bërë somelierë dhe ata që thjesht duan të dinë më shumë rreth verës. Të dyja gratë e mbështesin në mënyrë aktive Black Wine Professionals themeluar nga Coney, një burim për të gjetur somelierë profesionistë me ngjyrë ku Dubose shërben si drejtoreshë e edukimit. Dubose menaxhon gjithashtu The Lotus & The Vines, një platformë e krijuar për të ripërcaktuar kulturën e verës, duke e bërë atë më të hapur, ndërsa Pitts ofron një shërbim privat të kombinimit dhe përzierjes së verërave për të ndihmuar në edukimin e brezit të ardhshëm të profesionistëve të verës.
Por ka ende shumë rrugë për të bërë. “Aktualisht nuk ka asnjë femër me ngjyrë master sommelier, edhe pse shumë syresh janë në rrugë të mbarë”, thotë Dubose. “Industria e verës është si një anije e madhe dhe do të duhet kohë që të kthejë drejtimin, por pak nga pak do t’ia arrijë”.
5 somelieret me ngjyrë që duhet të ndiqni:
Jamie Brooks Robertson është shkrimtare dhe studiuese e pavarur që jeton në Londër; ajo është edhe eseiste e shquar që fokusohet në shëndetin dhe kulturën
