Terapia e gjumit: Eksplorimi i aventurës së palogjikshme të ëndrrave

Duket e çuditshme kur e mendon. Jeni duke fjetur dhe pastaj, papritmas, e shikoni veten në një film. Jeni duke ëndërruar; diku tjetër, ndoshta edhe për dikë tjetër. E njëjta gjë, por e ndryshme. Për skeptikët imazhet janë trillime të pastra, fëminore, por nëse e shqyrtoni pak më thellë, atëherë do të gjeni më shumë gjëra të përbashkëta me jetën tonë të vërtetë. Një derë e vogël sekrete, një koktej i skutave tona më të fshehta të psikikës. Siç thotë edhe Gloria Steinem, të ëndërrosh është një formë planifikimi; një mënyrë tjetër e të parit. Paul McCartney foli për kompozimin e Yesterday si diçka që buroi nga subkoshienca e tij më e thellë: “Thjesht u rrëzova nga shtrati dhe kuptova se cila notë po luhej në ëndërr… dhe kështu që e kompozova”. E shikoni, e çuditshme.

Sipas neuroshkencëtarit dhe autorit të librit Why We Sleep (“Pse flemë”) nga Matthew Walker, ëndrrat mund të veprojnë si një formë “terapie gjumi”, duke përpunuar informacione të kaluara autobiografike të ruajtura në tru. Dhe ndodh shpesh që ndihemi të trullosur për t’i ndarë dhe deshifruar këto gjetje me të tjerët, të dëshpëruar për të rrëfyer çdo detaj përpara se ta harrojmë; përpara se të kthehemi në realitetin e ditës me ritmin e tij më pak absurd. Kjo, gjithashtu, mund të jetë terapeutike. Një studimi të ri thotë se të folurit rreth halucinacioneve tona për shkak të gjumit, nga ato banale tek ato të bukura, e rrit empatinë. “Unë mendoj se është e dobishme për njerëzit që të flasin rreth ëndrrave të tyre”, thotë Deirdre Barrett, një studiuese e ëndrrave pranë Shkollës së Mjekësisë në Harvard dhe autore e Pandemic Dreams. “[Veçanërisht pasi] ëndrrat e njerëzve shfaqen ende më shqetësuese se përpara fillimit të pandemisë”. Lidhur me një grua që ishte udhëzuar në ëndërr se duhej të zhvillonte mësimin me një klasë të tërë në ambientet e shtëpisë, dhe një tjetër që ishte caktuar si banorja e parë në Mars (ndërsa protestonte se kjo nuk ishte zgjedhja e saj), Barret thotë: “Kjo është qesharake për shkak të ekzagjerimit. Por do të thotë diçka”.

Çfarë është kjo “diçka”? Territori Fuzzier. Një faktor lehtësues që e shton etjen tonë për të kuptuar ëndrrat tona është përdorimi i aplikacioneve që ju ndihmojnë të provoni dhe gjurmoni ato që shikoni në ëndrrat tuaja. Duke qenë se ëndrrat rrallë mbartin ndonjë kuptim të mirëfilltë, edhe interpretimi i tyre nuk duhet të merret aq drejtpërdrejt.

“Unë nuk besoj se të gjitha ëndrrat kanë të bëjnë me plotësimin e dëshirave”, shpjegon Barrett. “Ëndrrat nuk kanë një linjë të organizuar, ashtu siç ndodh me mendimet kur jeni zgjuar, dhe disa nga këto mendime janë në formën e fantazisë dhe thurjes së strategjive. Por [kur ëndërrojmë] truri ynë është duke shfaqur më shumë imazhe, por zonat [e trurit tonë] që lidhen me logjikën lineare dobësohen. Është pikërisht ajo aventurë e palogjikshme, duke kaluar në një sferë tjetër, që nuk ka as fillim e as fund të vërtetë, por që është tërheqëse. Është me vend që do të donim ta kujtonim dhe ta interpretonim atë përvojë. Udhëtime që mund të ndryshojnë nga kaotike në të lodhshme në mënyrë të pashpjegueshme. Ndonjëherë ato qëndrojnë me ju sa hap e mbyll sytë ose një jetë të tërë. Ndonjëherë ne pushtohemi nga një vend me histori të cilat i krijojmë vetë. Me të vërtetë, është një lloj magjie.

Nga mëngjesi në mbrëmje, më poshtë po përmendim pesë “peshkatarë virtual ëndrrash” që mund t’i provoni...

1. Dreambook: Një aplikacion i mirë për fillestarët që duan të regjistrojnë dhe kategorizojnë ëndrrat e tyre çdo ditë.
2. Awoken: Përvetësoni artin e ëndrrave të kthjellëta – të jeni të vetëdijshëm se jeni duke ëndërruar, për aq sa mund ta kontrolloni atë, ndërsa është duke ndodhur.
3. Oniri: Një aplikacion multifunksional që përfshin 500+ mënyra të interpretimit të ëndrrave, opsione për shënime zanore, teknika të qarta ëndrrash dhe tinguj qetësues që ju ndihmojnë të flini.
4. Dreamboard: Pinterest për ëndrrat, ku mund të krijoni grafikun tuaj të ëndrrave, duke krijuar një model më të qartë me kalimin e kohës.
5. Mind Awake: Një aplikacion ndërgjegjësimi me meditime, kurse në audio dhe udhëzime ekspertësh për përmirësimin e gjumit dhe për të kujtuar ëndrrat.

 Emma Firth është shkrimtare, me bazë në Londër, për revistën “British Vogue”, “W”, “Elle”, “ES” dhe “Rolling Stone UK”, si dhe kolumniste këshilluese dhe eksperte e intimitetit për koleksionin dhe platformën krijuese të Christopher Kane  More Joy