Teoria e konspiracionit të ‘Love Jihad’: Një shpjegim 

Në janar 2023, qindra mbështetës të partive politike hinduiste të krahut të djathtë organizuan një demonstratë në Mumbai kundër asaj që ata e quajnë “Xhihadi i Dashurisë”. Ky term, i përdorur fillimisht për të përshkruar marrëdhëniet me besim të përzier në Indi, i konsideruar i diskutueshëm nga shumë njerëz, tani është bërë sinonim i një teorie konspirative sipas së cilës burrat myslimanë paraqiten si hinduistë për të joshur dhe për t’u martuar me gra hinduiste, duke i konvertuar ato në fenë islame. 

Marshimet në Mumbai përbënë kulmin e një fushate njëmujore të zhvilluar për të tërhequr vëmendjen ndaj Xhihadit të Dashurisë. Mbështetësit e kësaj teorie pohojnë se fenomeni është kaq i përhapur, saqë e bën të nevojshme marrjen e masave për të mbrojtur gratë që ato të mos bien pre e këtyre keqbërësve.

Protestuesit përmendën disa incidente si dëshmi të kësaj. Studentja hinduiste Nikita Tomar u vra nga i dashuri i saj, Tauseef Ahmed, në vitin 2020. Gjatë gjykimit të tij, prokuroria argumentoi se Ahmed e vrau Tomar sepse ajo refuzoi të martohej me të dhe të konvertohej në fenë islame. Ahmed u dënua me burgim të përjetshëm. Shitësja hinduiste Shraddha Walkar u mbyt për vdekje nga partneri i saj, Aftab Poonawala, në vitin 2022. Ndërsa nuk ka asnjë provë të qartë se Poonawala është mysliman, aktivistët argumentojnë se vrasja e Shraddha është një rast tjetër i Xhihadit të Dashurisë. Poonawala është ende në pritje të dënimit.

Ky rikalibrim i teorisë së Xhihadit të Dashurisë është vetëm një simptomë e një përhapjeje më të gjerë të islamofobisë në Indi. Në shtator të vitit 2022, organizata Human Rights Watch raportoi se paragjykimet institucionale të autoriteteve indiane dhe përdorimi i shtuar i forcës së tepruar kundër komuniteteve myslimane “po i dërgon një mesazh publikut se myslimanët mund t’i nënshtrohen diskriminimit dhe sulmeve”. Ndërsa ndryshimet qeveritare janë planifikuar për të kriminalizuar konvertimet e detyruara fetare, riformulimi i Xhihadit të Dashurisë si një akt kriminal agresioni nga burrat myslimanë e nxit edhe më tej diskriminimin fetar në vend.

Aktivistët dhe opinionistët indianë thonë se përkrahësit e kësaj teorie po diskriminojnë pikërisht grupin që ata pretendojnë se mbrojnë: gratë. Duke folur në një episod të fundit të podkastit indian SheThePeople, superylli i Bollywood-it dhe aktivistja për të drejtat e grave, Richa Chadha, thekson se teoria e konspiracionit të Xhihadit të Dashurisë “është politizuar; një debat i krijuar për të kontrolluar gratë dhe trupat e tyre”.

Me fjalë të tjera, përveç denigrimit të burrave myslimanë (dhe, rrjedhimisht, myslimanëve në përgjithësi), nënkuptimi i përkrahësve të Xhihadit të Dashurisë është se gratë janë të dobëta dhe, kur bëhet fjalë për zgjedhjen e një partneri të përshtatshëm, gjykimi i tyre nuk është për t’u besuar. Kavita Krishnan, një aktiviste kundër dhunës në familje, e përshkruan mishërimin aktual të Xhihadit të Dashurisë si “një sulm ndaj të drejtës së një gruaje për të dashur dikë që ajo zgjedh ta dojë”.

Shkrimtarja, studiuesja dhe aktivistja për të drejtat civile, fituese e çmimeve, Meena Kandasamy, argumenton se fuqia e grave indiane për të marrë vendime po konfiskohet”. “Xhihadi i Dashurisë është një koncept i krijuar nga forcat e djathta për të demonizuar burrat myslimanë dhe për t’i trajtuar gratë hinduiste si të papjekura, të cilat përbëjnë pjesën më të madhe të komunitetit këtu”, thotë ajo. “Kjo është një armë tjetër e një qeverie të ekstremit të djathtë për të polarizuar më tej njerëzit dhe për të siguruar që gratë të monitorohen, kontrollohen dhe mbikëqyren vazhdimisht – të jenë të pafuqishme”.

Simon Coates është shkrimtar dhe artist që jeton në Londër, i cili ka shkruar për revista të ndryshme, duke përfshirë “The New European” dhe gazetën skoceze “The National”.