Stilistja britanike që sjell modën e adaptueshme në pasarelë

Në shtator 2022, një klip nga shfaqja debutuese e Javës së Modës Londineze të Chamiah Dewey u bë virale në TikTok dhe hodhi dritë mbi një hendek të madh në atë që shumë menduan se ishte një industri që dalëngadalë po bëhej më gjithëpërfshirëse. Shfaqja e stilistes britanike Dewey përfshinte modele me nanizëm, disa në karrige me rrota, aftësi të kufizuara në lëvizje dhe ato me sëmundje të kockave të brishta. Të gjitha gratë ishin nën 1.5 metra të gjata, një komunitet jashtëzakonisht i nënpërfaqësuar në pasarelë.

Me një interes të hershëm për modën dhe një sfond artistik, nuk është çudi që Dewey zgjodhi një karrierë si stiliste e modës. Por ajo e kuptoi qëllimin e saj, ndërsa ishte duke punuar si vullnetare në një program për të rinjtë në vitin 2018, ku takoi një tjetër vullnetare me akondroplazi, forma më e zakonshme e nanizmit, dhe kuptoi se si industria e modës i injoronte plotësisht njerëzit me aftësi të kufizuara.

“Në atë kohë kishte vetëm një markë në Gjermani që e bënte këtë, por veshjet e tyre ishin mjaft të thjeshta dhe të shtrenjta”, shpjegon Dewey. Prandaj, ajo ndjeu nevojën për të krijuar veshje me çmime të pranueshme, por edhe në modë, megjithëse, si person me gjatësi mesatare, ndjenjat e saj ishin të përziera. “Në fillim nuk isha e sigurt se si të zhvilloja një bisedë me njerëzit… më duhej të mësoja termat e duhur”, thotë ajo.

Dhe kështu, në vitet para hedhjes në treg të markës së saj me të njëjtin emër në vitin 2021, 24 vjeçarja kreu disa kërkime shteruese. Ndërsa ishte ende studente në London College of Fashion, ajo intervistoi gra me nanizëm, krijoi manekinin e parë të veshjes në botë në formën e një gruaje me akondroplazi dhe botoi libra me modele për të vërtetuar se edhe njerëzit me shtat të shkurtër i përkisnin hapësirave të modës. Për shkak të autenticitetit dhe përkushtimit të Dewey ndaj modës së adaptueshme ajo më në fund fitoi mbështetjen e komunitetit. Që atëherë ka hedhur në treg koleksione të rrobave të shtëpisë, fustaneve të nusërisë, këpucëve dhe veshjeve për meshkuj.

Megjithatë, ky nivel përfaqësimi vazhdon të mungojë në të gjitha fushat krijuese dhe mbështetja e vazhdueshme financiare mbetet një pengesë. Në fund të fundit, çelësi për të vënë re ndryshimin është një vëmendje më e theksuar, thotë Dewey. “Një e katërta e popullsisë në MB është me aftësi të kufizuara, por vetëm 4% e atyre në media janë me aftësi të kufizuara. Ky është problemi kryesor”.

Yelena Grelet është gazetare e pavarur që jeton në Londër