Sirenat e ekranit: një dokumentar për grupin e parë metalik libanez, tërësisht femëror

“Kur dëgjova Mayan të bërtiste për herë të parë, mbaj mend të kem menduar, ku tjetër në shoqëri kanë mundësi ta bëjnë gratë këtë?”. Rita Baghdadi, regjisore dokumentarësh nga Los Anxhelos dhe fituese e çmimit Emmy, flet për një nga protagonistet e filmit të saj të fundit Sirens. Filmuar në Bejrut midis viteve 2018 dhe 2021, ai ndjek historinë e fuqishme të Lilas Mayassi, Shery Bechara, Alma Doumani, Maya Khairallah dhe Tatyana Boughaba, të njohura si Slave To Sirens, grupi i parë i muzikës metal, i përbërë tërësisht nga femra.

Udhëtimi i tyre filloi me një miqësi në Skype midis Baghdadit dhe Mayassit, një kitariste, pasi zbuloi muzikën e grupit në Facebook. Ato krijuan një lidhje të ngushtë dhe Mayassi e ftoi atë në Bejrut. “Pashë versionin më të ri të vetes dhe mendova se edhe të tjerët do të shihnin tek ajo veten e tyre”, thotë Baghdadi. “Lilas ishte thjesht vetvetja, teksa përballej edhe me shumë vështirësi. Njohja personalisht me të më bëri të kuptoj se ajo do të ishte një njeri i jashtëzakonshëm për të cilin mund të bëja një dokumentar”.

Duke patur në qendër marrëdhënien midis Mayassit dhe kitaristes Bechara, dokumentari shfaq muzikantet, gra arabe gjatë kohërave të trazuara në historinë e Libanit, që përpiqen t’ia dalin në rrethana të jashtëzakonshme, përfshirë një revolucion dhe traumën e paimagjinueshme të shpërthimit në portin e Bejrutit në vitin 2020. Filmi ndërthur historinë e Libanit në sytë e grupit muzikor, “me elementet e muzikës dhe të politikës; çdo gjë duhet të rridhte përmes vajzave”, thotë Baghdadi. 

Për anëtaret e bandës, përvoja e papritur e të qenit pjesë e një dokumentari të një regjisoreje nga LA me jetën e tyre në qendër, ka ofruar një platformë për të ndjekur muzikën metal – dhe të frymëzojë më shumë vajza për të bërë të njëjtën gjë. “Duam që vajzat që e shikojnë filmin të ndihen se mund të bëjnë çfarëdo që të duan pa u gjykuar”, shprehet Bechara. Doumani shton, “Ne përballemi me shumë pengesa, si, ‘Oh, ti je vajzë. E ç’do ti në një bandë të muzikës metal? Ti duhet të jesh e butë dhe e ndjeshme’. Por ne duam që ato të jenë të guximshme, të thyejnë barrierat dhe të bëjnë atë që duan”.

Çka është më e rëndësishme, Sirens përmbys stereotipet që mbizotërojnë në Lindjen e Mesme. Me prejardhje nga i njëjti rajon, Baghdadi ishte këmbëngulëse në faktin se nuk donte që historia të sillej rreth temave të shtypjes apo konfliktit. Në vend të kësaj, ajo i portretizon Slave to Sirens “si vajza të reja të cilat duan thjesht të jetojnë jetën e tyre”.
Sirens mund ta shikoni në Apple TV dhe gjatë shfaqjes në Screenwave Film Festival, Australi (28 prill); Rock This Town Festival Francë (29 prill) dhe Pink Apple Festival, Zyrih (1 maj)

Pia Brynteson është ndihmësredaktore në Service95

_{Slave To Sirens; Lilas Mayassi, Shery Bechara ⓒ Oscilloscope Laboratories; Slave To Sirens ⓒ Davina Maria; Lilas Mayassi, Shery Bechara ⓒ Oscilloscope Laboratories; Tatiana el Dahdah, Rita Baghdadi; Rita Baghdadi, Glastonbury (2019)}