Qilim prej gëzofi artificial, rërë rozë & pasqyra shtrembëruese: Në brendësi të Spazio Meta-s për materialet e riciklueshme për ripërdorim

E vendosur në ish-lagjen industriale të Bovisës, në periferinë veriore të Milanos, ndodhet një depo 300 metra katrore e mbushur plot me materiale të hedhura nga shfaqjet e modës, ekspozitat e artit, instalimet e përkohshme dhe sesionet fotografike. Aty ka qilima të çdo trashësie – përfshirë ato me lesh artificial ngjyrë ulliri që mbuluan ambientet e brendshme të shfaqjes së Prada-s gjatë Javës së Modës në Milano në shkurt 2022 – pëlhura në një mori nuancash, xhama në forma të ndryshme dhe gjithçka shitet me çmime të lira. Ky është Spazio Meta, një start-up i nisur pranverën e kaluar nga mikeshat e kthyera në sipërmarrëse, Martina Bragadin, Margherita Crespi dhe Benedetta Pomini, që kishin për qëllim të ofronin një zgjidhje alternative – dhe me kosto efektive – ndaj mbiprodhimit dhe humbjes së burimeve që rrjedhin nga arti, moda dhe sektorët e dizajnit.

Të tria gratë kanë histori të ngjashme: Bragadin dhe Crespi kanë studiuar së bashku për skenografi në Milano, ndërsa Pomini ka punuar në galeri artesh dhe ekspozita si mbikëqyrëse e proceseve të prodhimit. “Ne të gjitha jemi dëshmitare okulare, se sa e paqëndrueshme mund të jetë fusha e artit krijues kur bëhet fjalë për ngjarje të përkohshme”, më thotë Bragadin , “nga burime të shumta që përdoren për skenografi që zgjat vetëm disa orë, deri te çështja se shumica e materialeve të përdorura për një shfaqje mode ose një ekspozitë arti zakonisht hidhen pas përfundimit të eventit – edhe pse janë ende në gjendje të shkëlqyer dhe të riciklueshme”. Ato e themeluan Spazio Meta për të “kundërshtuar këtë kulturë të mbetjeve”, thotë ajo.

Ekipi i tyre i vogël e bën këtë, duke vlerësuar dhe përzgjedhur materiale të përdorura nga klientë dhe furnitorë të ndryshëm – duke përfshirë markat e modës si Prada dhe panairet e dizajnit, si edhe Salone del Mobile.

Oferta është e shumëllojshme: përveç materialeve konvencionale, në kohën e shkrimit të artikullit, kishte gjithashtu 600 kilogramë rërë rozë, rekuizita gjigante me lakër dhe pasqyra shtrembëruese, të gjitha të disponueshme.

Në mënyrë të pazakontë, salloni i Spazio Meta nuk është vetëm për njerëzit që e njohin industrinë, por është gjithashtu i hapur edhe për publikun. “Ne duam të shërbejmë si një hapësirë komunitare për këdo me prirje artistike”, thotë Pomini. “Gjithçka ka të bëjë me nxitjen e një qasjeje më të përgjegjshme dhe të riciklueshme për krijimin e artit në të gjitha format e tij dhe lehtësimin e përdorimit dhe ndarjes së burimeve”.

Marianna Cerini është gazetare e pavarur që shkruan artikuj rreth udhëtimeve, modës, arteve dhe tendencave kulturore, të cilat janë botuar në “Conde Nast Traveller”, “The Telegraph”, “Time Out Beijing”, “Forbes” dhe “Vogue Italia”