Pse është e rëndësishme mënyra se si portretizohen myslimanët në filma dhe në TV
Gjatë një shfaqjeje private në Londër, pashë dokumentarin An Act Of Worship të regjisorit mysliman Nausheen Dadabhoy. Mbi dy orë, së bashku me spektatorët e tjerë, pamë një histori të 30 viteve të fundit të jetës myslimane në SHBA, që fillon me Luftën e Parë të Gjirit dhe përfundon me ndalimin e udhëtimit për myslimanët nga Trump. Dëgjuam historinë e një gruaje që ngacmohej kur ishte në shkollën fillore për shkak të veshjes së saj tradicionale pakistaneze. Një sërë familjesh të prekura nga ndalimi i udhëtimit kanë përshkruar zhgënjimin dhe dhimbjen për shkak të ndarjes. Dhe dëgjuam fjalët e një babai, i cili për shkak të problemeve me emigracionin, nuk mundi të ishte në dasmën e vajzës së tij.
Këto histori nuk janë as unike dhe as të panjohura; si një myslimane e rritur në Amerikë, kam dëgjuar për përvoja të ngjashme në komunitetin tim, por t’i shihja ato teksa shpaloseshin në ekranin e madh ishte surreale, duke demonstruar shtrirjen e tyre sistematike dhe kombëtare. Sipas një sondazhi nga Institute for Social Policy and Understanding, 62% e myslimanëve në Shtetet e Bashkuara përjetojnë diskriminim fetar në jetën e përditshme. Arsyet për diskriminim janë komplekse dhe të nxitura nga vitet e racizmit sistematik, por ato gjithashtu përkeqësohen nga imazhet e dëmshme që njerëzit shohin në ekranet e tyre televizive.
Si menaxhere programi pranë Pillars Fund, një organizatë jofitimprurëse në SHBA që mbështet liderët dhe artistët myslimanë, unë e dëshmoj këtë realitet çdo ditë. Në vitin 2019, ne e dinim tashmë nga përvoja personale se myslimanët ishin të keqpërfaqësuar në media, por nuk kishte të dhëna për të mbështetur këto vëzhgime për të na ndihmuar të sillnim ndryshim. Për të mbushur këtë boshllëk, ekipi ynë bashkëpunoi me Ford Foundation dhe aktorin e producentin britanik Riz Ahmed për të mbështetur dy studime të USC Annenberg Inclusion Initiative. Hulumtimi shqyrtoi mënyrat se si personazhet myslimanë u portretizuan në filma dhe seri televizive kryesore nga viti 2017 deri në 2019 në SHBA, MB, Australi dhe Zelandën e Re.
Rezultatet, edhe pse jo befasuese, janë mjaft negative. Shumica dërrmuese e myslimanëve nuk shfaqen fare në ekran: vetëm 1% e të gjithë personazheve që flasin në seritë televizive janë myslimanë, edhe pse ata përbëjnë pothuajse një të katërtën e popullsisë së botës. Kur myslimanët portretizohen, kjo shpesh ka të bëjë me dhunën. Në filma, 30% e personazheve myslimanë portretizohen si të dhunshëm; në TV, 12% e tyre vdesin në mënyrë të dhunshme gjatë tre episodeve të para. Këto stereotipe prekin edhe racën. Dy të tretat e personazheve myslimanë në filma janë nga Lindja e Mesme/Afrika e Veriut (MENA), edhe pse ata vijnë nga shtete dhe etni të ndryshme nga i gjithë globi.
Cilësia e personazheve në ekran nuk kufizohet vetëm me përfaqësimin. Këto portrete kanë një ndikim të jashtëzakonshëm në mënyrën se si njerëzit në mbarë botën i shohin myslimanët dhe si e shohim ne veten tonë. Studimet kanë zbuluar se myslimanët janë grupi fetar në SHBA që ka më shumë gjasa të tentojë vetëvrasjen dhe se myslimanët britanikë përjetojnë më shumë depresion dhe ankth në krahasim me pjesën tjetër të popullsisë. Këto implikime të shëndetit mendor shpesh lidhen me ndjesinë e margjinalizimit dhe diskriminimit në jetën tonë të përditshme. Ky ndikim shtrihet në zhvillimin e politikave të dëmshme të jashtme dhe të brendshme.
Pra, si mund të krijojmë portrete më të sakta dhe më të plota për brezat e ardhshëm? Së pari, duke mbështetur artistë myslimanë si Nausheen Dadabhoy, që duan të përcjellin histori autentike dhe provokuese. (Programi ynë Pillars Artist Fellowship u ofron regjisorëve dhe shkrimtarëve myslimanë të ardhshëm në SHBA dhe MB një grant prej 25,000 dollarësh, këshilla të përshtatshme dhe mundësi për të treguar histori pa presionet e paragjykimeve anti-myslimane). Ne ftojmë gjithashtu drejtuesit e industrive, financuesit dhe artistët që t’i bashkohen kësaj lëvizjeje, qoftë përmes mbështetjes financiare ose thjesht duke mësuar më shumë se si të kryejnë ndryshime sistematike. Blueprint for Muslim Inclusion është një udhëzues për studiot, agjencitë e talenteve edhe partnerët e tjerë për të mbështetur më mirë krijuesit myslimanë dhe për të shmangur stereotipet e rrezikshme. Drejtuesit e industrive mund të ndërmarrin veprime të thjeshta transformuese, duke u regjistruar në Muslim Visibility Challenge, që do të thotë angazhim për të eliminuar stereotipet terroriste nga përmbajtja e ardhshme dhe punësim i të paktën një krijuesi mysliman të autorizuar për të zhvilluar tregime të plota dhe të shfrytëzojë aftësitë e tij si tregimtar.
Aya Nimer është menaxhere programi pranë Pillars Fund dhe përgjegjëse për zhvillimin e programeve të ndryshimit të kulturës që mund të çojë përpara misionin e Pillars për të ndryshuar retorikën për myslimanët në SHBA
