Pse duhet ta harrojmë fjalën “fuqizim” dhe në vend të kësaj të përqendrohemi te fuqia
Vajza, a ndiheni të fuqizuara? Shpresoj të jetë kështu, sepse gjatë dhjetëvjeçarit të fundit kompanitë ndërkombëtare kanë punuar natë dhe ditë për të gjetur mënyra të reja për të fuqizuar gratë. Markat e deodorantëve kanë zhvilluar fushata për të fuqizuar gratë që të ndihen mirë me veten. Victoria’s Secret u zotua që do të bëhej “avokatja kryesore në botë për gratë”. Hoteli i ri modern “Zena” i hapur në Uashington DC, i është dedikuar fuqizimit të femrave dhe përmban vepra arti të krijuara me tamponë dhe një kokteil 16 dollarë të quajtur Empowermint.
Në vitet e fundit feminizmi i korporatave dhe kultura e të kujdesurit për veten e kanë kthyer fuqizimin në një taktikë marketingu. Blini këtë shampo, se ajo do t’ju fuqizojë! Blini këtë makinë, se ajo do t’ju fuqizojë! Blini këtë qiri me aromë 75 dollarë, se ai do t’ju fuqizojë! Fuqizimi është kthyer në një fjalë zhargoni e mërzitshme, por më e rëndësishme, është se kultura e fuqizimit është shndërruar në një mënyrë mashtruese për të përforcuar strukturat ekzistuese të fuqisë. Empowered Woman™ moderne nuk e vendos në pikëpyetje kapitalizmin; ajo i blen vetes gjëra të shtrenjta si një formë kujdesi ndaj vetes. Atë nuk e shqetëson pabarazia strukturore, për sa kohë që mund të gjejë një mënyrë për të arritur te strukturat e larta drejtuese të një kompanie, ajo është e lumtur me situatën aktuale.
Kultura e fuqizimit kërkon të ndryshojë individin në vend që të ndryshojë sistemin. Mendoni për të gjitha këshillat që vajzat kanë marrë në lidhje me udhëheqjen në vitet e fundit. Na është thënë se, – “Nëse doni të ecni përpara, duhet të pranoni sfida dhe të ndërmerrni përgjegjësi. Duhet të ngrini zërin. Duhet të ndaloni së kërkuari ndjesë. Nëse ndryshoni për t’iu përshtatur një sistemi të krijuar nga meshkujt e nëse veproni si një mashkull, atëherë zëri juaj do të dëgjohet. Ky është problemi me fjalën “fuqizim”, e shihni, kjo do të thotë që dikush t’ju japë fuqi apo t’ju mundësojë diçka; kjo në njëfarë mënyre sugjeron që ju jeni të paafta të ndihmoni veten tuaj.
Në vend që të funksionojë për ta çuar përpara feminizimin, kultura e fuqizimit e ka lënë atë pas. Ajo fokusohet në arritjet individuale në vend të barazisë strukturore. Është koha ta ndryshojmë këtë, të ndalojmë së foluri për fuqizimin dhe në vend të saj të fokusohemi te fuqia. Kohët e fundit intervistova Amina Mohammed, zëvendëssekretaren e përgjithshme të Kombeve të Bashkuara. “Natyra nënçmuese sipas së cilës jemi mirëpritur në arenën e udhëheqjes është një narrativë që duhet ta ndryshojmë”, – më tha ajo. “Ekziston ende një farë ideje që [fuqia është] diçka që na është dhuruar me dashamirësi. Por e dini çfarë? Fuqia nuk jepet asnjëherë, por merret”.
Pra, çfarë me jep mua shpresë? Në vend që të mbështetemi në strukturat toksike të fuqisë, një gjeneratë e re femrash udhëheqëse po heqin dorë nga ato. Ato janë të vendosura që të udhëheqin sipas mënyrës së tyre. “Ne nuk duhet të kërkojmë asnjëherë leje apo të presim një ftesë për të udhëhequr” – tha kongresmenia e Minesotës Ilhan Omar, kur u pyet se çfarë do t’u thoshte grave me ngjyrë të cilat janë të shqetësuara nga komentet që kërkojnë të zvogëlojnë ndikimin e tyre. “Është një luftë e vazhdueshme me njerëzit që kanë pushtet për ndarjen e pushtetit”, – tha ajo. “Ne nuk jemi në garë për të kërkuar që të jemi pjesë e atij pushteti; por të përpiqemi ta marrim pushtetin dhe t’ua kthejmë njerëzve”. Pra, e keni parasysh dëshirën për ta ndarë pushtetin, sesa për të fuqizuar veten? Kështu duket feminizmi i vërtetë.
Arwa Mahdawi është publiciste e rregullt e “The Guardian” që jeton në Nju-Jork dhe autore e dokumentarit “Udhëheqja e fortë e femrave“: Leksione nga gratë në pushtet
