Pse arti i Raelis Vasquez po fokusohet në komunitetin afro-latin

Kur futeni në një muze të madh dhe doni të shikoni një pikturë ose portret, ka shumë mundësi të gjeni vepra nga një perspektivë e kufizuar, e përqendruar te perëndimi – si në aspektin e artistëve që krijojnë veprën, ashtu edhe në subjektet e paraqitura në to. Një studim në vitin 2019 nxori në pah se 85% e artit në koleksionet e muzeve në SHBA është vepër e artistëve të bardhë. Duke u ndalur te të nënpërfaqësuarit, Raelis Vasquez, artisti afro-latin, vepra e të cilit është shfaqur në galeritë prestigjioze të artit si “Sakhile&Me”, “Jeffrey Deitch” dhe “Kunstraum Potsdam”, është pjesë e gardës së re që restauron botën e artit. “Unë dua që vepra ime të konsumohet nga njerëzit që pikturoj”, thotë ai. 

Pikturat e gjalla dhe kompozimet e detajuara të Vasquez – të cilat na kredhin drejt e në festimet familjare dhe skenat e përditshme – pasqyrojnë përvojën afro-latine me një ëmbëlsi të veçantë, duke shqyrtuar pyetje dhe tema që kanë qenë më aktuale gjatë gjithë jetës së tij: emigracioni dhe identiteti kulturor. I rritur në Republikën Dominikane, ai emigroi në një moshë të re në Nju Xhersi, ku kuptoi se çfarë do të thotë të jetosh në dy “botë krejtësisht të ndryshme”. Pikturat e tij e gjejnë frymëzimin tek imazhet që ai kap gjatë vizitave në vendlindjen e tij, ku ai fotografon familjen dhe të panjohurit. Më vonë, ai i analizon imazhet në studion e tij, duke zgjedhur elementë të ndryshëm nga fotot përpara se të fillonte punën në kanavacë. 

Ndërsa arti i tij synon të nxjerrë në pah injorimin që u bëhet komuniteteve afro-latine ose stereotipizimin me të cilin etiketohen ato, ka disa pyetje kyçe që drejtojnë punën e tij, shprehet ai. “A mund ta ruaj dhe ta përfaqësoj kulturën time ashtu siç ajo ndihet? A mund t’i ndihmoj njerëzit që përfaqësoj të arrijnë atë nivel të caktuar dinjiteti? A mund t’i bëj ata të ndihen sikur janë më madhështorë, sesa janë në të vërtetë?”, pyet ai. Në fund të fundit, kjo, së bashku me angazhimin e tij ndaj përfaqësimit afro-latin në botën e artit, është “prioriteti i tij i parë”. Ai shpreson që “vepra të ndikojë në jetën e dikujt, ashtu siç ndikon tek unë”. 

Eva Recinos është gazetare e artit dhe e kulturës dhe shkrimtare e literaturës jotrilluese që jeton në Los Anxhelos.