Patatet e mia “të famshme” për festa
Më pëlqen kjo periudhë e vitit kur mund të strukem në shtëpinë time në Londër në shoqërinë e familjes dhe miqve, diçka që ndihet si luks i vërtetë pas një viti plot emocion (dhe të pabesueshëm) që përjetova. Një tjetër gjë që më pëlqen të bëj kur jam në shtëpi është t’i përvishem kuzhinës dhe të gatuaj për të dashurit e mi. Patatet e mia të pjekura janë shndërruar në sinonim të festave në familjen Lipa dhe jam shumë e lumtur ta ndaj me ju këtë recetë. Në 10 hapa të thjeshtë mund të përgatisni patate të shijshme që janë krokante nga jashtë dhe të buta si pambuk në brendësi. Shpresoj që ato të jenë një shtojcë e këndshme në festat tuaja – ato janë të shijshme të servirura së bashku me recetën e pulës së pjekur, për të cilën më filmonin, duke e përgatitur këtë verë.
Dua x
Përbërësit
Për 8 persona
2 kg patate Maris Piper (të zakonshme)
300 g dhjamë rose
1 kokë hudhër
10 g sherbelë
10 g trumzë
10 g rozmarinë
Kripë
Parapërgatitja: e bëj këtë një natë më parë, për të kursyer kohë ditën tjetër.
1. Qërojmë patatet, i presim në gjysmë (ose në copa rreth 5 cm) dhe i ziejmë ato për 15 minuta.
2. I kullojmë dhe i lëmë të thahen për disa minuta.
3. Tundim kullesën që patatet të jenë më të ashpra në sipërfaqe (gjë që ndihmon që yndyra të ngjitet më mirë te patatet dhe krijon një shtresë krokante nga jashtë dhe të buta brenda).
4. I hedhim patatet në një tavë të madhe ku të përhapen në një shtresë të vetme, i përziejmë me yndyrën e rosës dhe hedhim kripë.
5. E mbulojmë tavën me letër alumini dhe e vendosim në frigorifer gjatë gjithë natës.
Të nesërmen:
6. E ngrohim furrën paraprakisht në 180°C.
7. Ndërsa furra nxehet, shtypim thelpinjtë e hudhrës dhe grijmë erëzat.
8. Pasi furra të nxehet, hedhim gjysmën e erëzave në patate dhe i fusim në furrë për rreth një orë.
9. Nxjerrim patatet nga furra, i shtypim lehtë me pirun dhe shtojmë hudhrat dhe pjesën e mbetur të erëzave.
10. I vendosim sërish në furrë për 25 minuta të tjera dhe voilà, patatet e mia “të famshme” për festë janë gati. Ju bëftë mirë!
