Një kuzhinë revolucionare: Femrat italiane që shpëtuan nga dhuna në familje
Pas dhunës në familje prej dy dekadash, në fund Nicoletta Cosentino gjeti forcën për t’u larguar. Ajo flet me Marianna Cerini për sipërmarrjen e saj sociale “Female Cook Fighters”, e cila u vjen në ndihmë viktimave të dhunës në familje që ato të rifitojnë pavarësinë financiare dhe vlerësimin për veten.
Nëse Nicoletta Cosentino do të duhej ta përshkruante veten me një fjalë, ajo do të zgjidhte “këmbëngulëse”. “Mendoj se është fjala që më përkufizon më së miri”, thotë në telefon nga Palermo, Siçili, aty ku edhe jeton. “Edhe pse m’u desh një kohë për ta kuptuar këtë për veten time”.
Tetëmbëdhjetë vjet, për të qenë të saktë – periudha e marrëdhënies abuzive në të cilën ndodhej. “Ishte një lloj abuzimi psikologjik, për të cilin m’u desh një kohë e gjatë të kuptoja se kjo nuk ishte normale”, thotë ajo me çiltërsi. “Për shkak të denigrimit të vazhdueshëm që përjetoja, mendoja se mos isha unë fajtorja. Kur dikush të thotë çdo ditë se je pa vlerë ose nuk meriton më shumë, atëherë kjo të fiksohet në mendje. Dhe fillon ta besosh”.
Derisa erdhi një ditë – me ndihmën e qendrës lokale Le Onde, e cila kujdeset për gratë që kanë qenë viktima të dhunës në familje në Palermo – ajo ndaloi së besuari. “Sapo u ndërgjegjësova për dhunën që kisha pësuar, ndjeva nevojën të flisja rreth kësaj me gra të tjera dhe të ndihmoja këdo tjetër që mund të ishte në një situatë të ngjashme”, thotë ajo. “Doja që të dinin se nuk ishin vetëm”.
Cuoche Combattenti (që përkthehet “Kuzhinieret luftëtare”), një sipërmarrje sociale që Cosentino e themeloi në vitin 2019, është produkt i asaj dëshire për të ndihmuar.
Nëpërmjet një seminari dhe programi trajnimi, sipërmarrja, bashkon të mbijetuarat e dhunës në familje dhe u siguron atyre mjetet për të qenë të pavarura financiarisht, duke i mësuar të bëjnë reçel, konserva dhe salca të ndryshme, të cilat më pas shiten për publikun e gjerë. Përveçse janë prodhime artizanale, çdo produkt përcjell mesazhe kundër dhunës në familje në paketimin e tij: ‘Ti je e rëndësishme dhe mund të jesh e lirë’, ‘Ata që të duan, dëshirojnë që të jesh e lumtur’ dhe ‘Ka gjithmonë një rrugëdalje’.
“Ne i vlerësojmë këto mesazhe si mantra dhe përkujtues të vlerës sonë”, thotë Cosentino. Këto mesazhe më erdhën në mëndje shumë më para se të themeloja “Cuoche Combattenti”. Ato më rrodhën natyrshëm. Më pëlqen të them se ato janë të vërteta universale që të gjitha gratë duhet t’i dëgjojnë”.
Kjo është veçanërisht e vërtetë në Itali, ku, sipas ISTAT, 31.5% e grave kanë pësuar një formë dhune seksuale ose fizike gjatë jetës së tyre dhe 29.9% kanë vuajtur nga abuzimet psikologjike (kjo shifër rritet në 35% për ato të moshës nga 16 deri në 24 vjeçe). Që nga fillimi i vitit, janë vrarë 53 femra në nivel kombëtar, pra, një në çdo tri ditë.
Për shumë nga gratë që mësojnë nga “Cuoche Combattenti”, përvoja është transformuese. “Është një mundësi për t’ia nisur nga e para, por edhe për të përvetësuar aftësi plotësisht të reja dhe për të kuptuar se mund t’ia dalin mbanë vetë”, thotë Cosentino. “Kjo i vesh ato me një dinjitet të ri”.
Logoja e projektit, një grusht i ngritur me krenari duke mbajtur një okllai, përcjell të njëjtin mesazh që do të thotë: “Ne nuk jemi viktima, por luftëtare”, thotë ajo. Dhe se ato nuk kanë frikë ta kthejnëkuzhinën – një vend ku gratë e kanë humbur historikisht statusin e tyre – në një fushëbeteje kundër dhunës dhe abuzimit.
Duke parë drejt së ardhmes, Cosentino shpreson të shohë më shumë pjesëmarrëse të “Cuoche Combattenti” që të bashkohen në të gjithë Italinë dhe të jenë instrument i pavarësisë ekonomike dhe vetëvendosjes për këdo që mund të ketë nevojë.
“Pjesa më e bukur e punës sime është lidhja që krijoj me gratë që takoj”, thotë ajo. “Së bashku mund të mposhtim çdo gjë – dhe të mësojmë ta duam veten përsëri. Kjo është gjëja më e rëndësishme”.
Marianna Cerini është gazetare e pavarur që shkruan për tendencat kulturore, udhëtimet, modën dhe artin, artikuj të cilët janë botuar në “Conde Nast Traveler”, “BBC Travel”, “CNN Style”, dhe “Vogue Italia”
