Muzikali i Broadway na ofron një këndvështrim të thellë të muzikës K-Pop

K-pop, zhanri muzikor koreanojugor, i njohur për përzierjen e stileve, performancave shumë konceptuale dhe grupeve dominuese të top-listave, ka shpërthyer pothuajse në çdo cep të botës, por tani është në rrugën e tij drejt një skene krejtësisht tjetër.

Në fillim të këtij muaji, muzikali në Broadway i zhanrit KPOP zbarkoi në teatrin “Square” në Broadway, Nju Jork, duke u ofruar shikuesve një këndvështrim të thellë të këtij fenomeni muzikor, me një yll të vërtetë të K-pop si protagonist.

Në vitin 2017 KPOP u prezantua në Nju Jork në formën e një eksperience gjithëpërfshirëse larg skenave të Broadway. Më tej shtrohet pyetja: Pse K-pop nuk kishte mbërritur ende në SHBA? Në atë kohë suksesi i BTS në Amerikë ishte ende në fillimet e tij. Tani, në vitin 2022, kjo është bërë realitet dhe fokusi i muzikalit jo vetëm që ka evoluar për t’iu përshtatur vendndodhjes së tij të re (audienca do të qëndrojë ulur këtë herë), por vjen edhe në një moment vendimtar, për të mos përmendur fansat fanatikë që do ta mirëpresin.

“Këtë herë synojmë të eksplorojmë udhëtimin emocional të veçantë që duhet të bëjë një yll i K-pop”, shpjegon Helen Park, kompozitore dhe bashkautore e muzikës së shfaqjes.

KPOP zhvillohet gjatë regjistrimit të një koncerti vetëm për një natë kur një yll imagjinar – i luajtur nga Luna, e cila e filloi karrierën e saj në një nga grupet e para të vajzave K-pop të quajtur f(x) – largohet nga skena. Bashkëkrijuesi Jason Kim thotë se qëllimi i tij ishte të krijonte një muzikal me histori që eksploronin atë që ndodh prapa skenave, njësoj si Gypsy. Kjo analizë identiteti dhe ambicieje është në qendër të KPOP, por muzikali shpreh gjithashtu gëzimin dhe energjinë e kontekstit të koncertit, në të cilin çdo personazh, nga grupi i djemve dhe grupi i vajzave deri te protagonistja Luna, shpalos talentin e vet.

Park dëshironte që muzika e shfaqjes t’i bënte vërtetë homazh K-pop, dhe për këtë ishte e nevojshme të bëhej një kërkim i plotë mbi atë që e bën këtë zhanër kaq popullor, me tekste këngësh në koreanisht dhe anglisht. Ndërsa muzika trajton këto emocione universale dhe njerëzore, ajo gjithashtu eksploron disiplinën e hekurt që kërkohet nga yjet e K-pop, si trajnimi intensiv dhe presionet e vazhdueshme që u bëhen artistëve. “Është e pamundur të përfaqësosh të gjithë industrinë. Gjëja më e mirë që mund të bënim ishte të tregonim një histori sa më specifike të jetë e mundur”, shpjegon Kim. “Qëllimi ynë nuk është të ekspozojmë industrinë, por të gjurmojmë psikologjinë e një artisti me famë botërore që përjeton këtë sistem gjigant”.

Duke folur për Lunën, e cila është një yll i vërtetë i K-pop, Kim thotë: “Ajo nuk ka nevojë të imitojë dikë, sepse ajo është me të vërtetë ai person. Kjo i jep performancës një nivel autenticiteti që të lë pa fjalë”.

“Është nder i vërtetë të jesh në Nju Jork dhe të aktrosh në Broadway si artiste dhe aktore e K-pop, pikërisht në një kohë kur ky zhanër është mjaft popullor në mbarë botën”, shton Luna. “Angazhimi im në këtë muzikal më ka dhënë shumë mundësi të eksploroj se si dua të zhvilloj dhe përmirësoj karrierën time si këngëtare K-pop”.

Kjo “shfaqje e pasur dhe festive”, sipas fjalëve të Kim, shënon gjithashtu një hap të rëndësishëm drejt një përfaqësimi më të madh të tregimeve dhe tregimtarëve aziatikë në Broadway. “Ne po ndryshojmë fytyrën e Broadway”, thotë Park, duke shtuar, “ne vërtet po përpiqemi të krijojmë diçka që nuk ka ekzistuar kurrë më parë, dhe që kërkon shumë punë dhe shumë vëmendje për zhanrin e K-pop, por edhe për mënyrën se si përcillet një histori në Broadway”. 

Kim kujton kur vuri re një vajzë të re aziatike teksa shihte gjithë admirim natën përmbyllëse të produksionit të Off-Broadway pesë vjet më parë: “Shfaqja është për të gjithë, por veçanërisht për dikë si ajo. Ajo është personi që po mendoj. Ajo është Ylli im i Veriut”.

Jessica Derschowitz është redaktore dhe shkrimtare që jeton në Nju Jork, e specializuar në kulturë dhe argëtim, e cila ka shkruar për revista si “Entertainment Weekly”, “Vanity Fair”, “Variety”, “Bustle” etj.