Murgu që përdor makijazh

Kodo Nishimurës i pëlqen tualeti, rrobat e bukura, dhe t’i shërbejë komunitetit budist si murg në tempullin ku edhe u rrit. Kjo mund të duket si kontradiktore – edhe pse është e zakonshme që murgjit të bëjnë punë të ndryshme jashtë tempullit, pasi jo shumë prej tyre shkojnë në shkollën e modës Parsons në Nju Jork, bëjnë makijazh për klientët, përfshirë edhe Chloe x Halle, dhe të shfaqen në Queer Eye: We’re In Japan!

Udhëtimi i Nishimurës si makeup artist profesionist nisi fare pak pasi ai mbërriti në SHBA; si një student i vetmuar, ai ofroi t’i bënte makeup një personi që gjithashtu ishte në vështirësi. Ajo çka ai zbuloi më pas ishte se rezultati nuk ishte vetëm për një natë kujdesi për veten. Është një mësim që ai përpiqet që ta përfshijë në klasat e tij të gjithëpërfshirjes gjinore.

“Gjëja më interesante ishe se edhe pasi lahej makijazhi, vetëbesimi i [personit që njoha] mbetej aty”, kujton ai. “Dhe ajo ishte diçka që shpresoja të pasqyrohej në zemrën time. Ndjeva se edhe unë mund të isha i bukur. Edhe unë mund të isha i fuqishëm. Dhe nëse më duhej të mësoja për makijazhin dhe teknikat e aplikimit të tonit të syve dhe pudrës, ndieja se jo vetëm mund të frymëzoja [ata rreth meje] dhe njerëzit që më shikonin pa diskriminim, por edhe mund të ndihesha i bukur dhe me vlera”.

Përqafimi i të gjithë elementeve të personalitetit të tij – atë që ai e quan mishërimi i vlerave tradicionale dhe atyre të kulturës moderne – ishte ajo çka e nxiti Nishimurën të shkruante This Monk Wears Heels: Be Who You Are; një autobiografi e cila përshkruan kohën e shkollës në Amerikë, përqafimin e trashëgimisë japoneze, dhe mësimet fetare. Ai vendim u mor kryesisht, sepse budizmi ka qenë diçka që ai e ka parë me mospërfillje prej shumë kohësh.

“Mamaja ime është mësuese pianoje dhe ajo tha, ‘Nëse thua se e urren muzikën e Moxartit, atëherë duhet të luash muzikën e tij’”, thotë ai. “[Vetëm kështu,] mund të japësh një mendim të vlefshëm”. E njëjta gjë ishte e vërtetë edhe për mësimet e tij për t’u bërë murg, të cilat kulmuan me shugurimin e tij në vitin 2015. “[Para kësaj,] kisha dëgjuar vetëm disa fragmente për budizmin, [kështu që] isha shumë dyshues dhe mosbesues”. Por përmes procesit të shugurimit, Nishumura gjeti paqen që nuk e priste, dhe një komunitet që ishte i gatshëm për ta mirëpritur, dhe jo që ta turpëronin për seksualitetin, karrierën ose pamjen e tij. Dhe ky është një mesazh pranimi që ai gjithmonë do ta përsërisë në emër të komunitetit LGBTQIA+.

“Unë jam një lider fetar”, thotë ai prerazi. “Dhe ju them se, nga pikëpamja budiste, të gjithë janë njësoj të barabartë”.

Laura Studarus është gazetare udhëtimesh që jeton në Los Anxhelos, e cila ka shkruar artikuj për “BBC”, “Thrillist”, “Vice” dhe “Marie Claire”