Mënyra se si punojmë... Arkitektja e ambienteve të brendshme, Beata Heuman

Lëreni të kaluarën fëmijërore të zbukurojë shtëpinë tuaj: Unë e dëgjoj me vëmendje zërin fëmijëror që të gjithë kemi përbrenda. Dua t’ua tregoj këtë njerëzve, sepse të gjithë e kemi përbrenda vetes. Kjo mund të jetë vërtet e shëndetshme dhe t’ju sjellë më shumë lumturi në shtëpinë tuaj. Një nga mënyrat është të mendoni për gjërat me të cilat jeni rritur. Gjithmonë ekziston diçka sentimentale ose domethënëse. Pëlhurat tona me kuadrate zënë një pjesë të madhe të fëmijërisë dhe adoleshencës sime në Suedi, dhe ngjyrat që zgjedh janë të lidhura me kujtimet e fermës dhe kopshteve tona. Dhe mos u shqetësoni shumë se cila është gjëja e duhur – thjesht gjeni ato gjëra që janë të veçanta për ju. Për zgjedhjet e saj sartoriale: Unë nuk kam një ‘uniformë’ pune, por më pëlqen të luaj me veshjen. Prirem të ulem këmbëkryq (si një pesëvjeçare!), kështu që më pëlqen diçka e rehatshme rreth belit. Unë jam një admiruese e zjarrtë e markës Bode. Tani kjo është shndërruar në një markë të madhe, por kur u ndesha me të herën e parë, më frymëzoi jashtëzakonisht shumë. Është një mënyrë unike për të prodhuar rroba dhe estetika është vërtet tërheqëse. Në parim, është një markë veshjesh për meshkuj, por është pikërisht kjo ajo që më bën t’i shijoj më shumë veshjet e kësaj marke. Loretta Caponi është një tjetër dyqan në Firence që më pëlqen shumë. Ai ofron veshje të modës shumë të vjetër dhe fustane të rehatshme. Për të qenë e sinqertë, më tërheq çdo gjë që më jep ndjesinë e ‘botës së vjetër’. Për muzikën ndërsa punoni: Radiooooo është një aplikacion i mrekullueshëm. Aty shfaqet harta e botës dhe mund të zgjidhni çfarëdo shteti dhe dekade – qoftë diçka nga vitet 1910 ose 1970 – dhe të dëgjoni muzikë të njohur në atë periudhë dhe në atë shtet. Kohët e fundit, kam qenë duke dëgjuar Can I Get There By Candlelight nga David McWilliams, Starálfur nga Sigur Rós dhe Ohne Chanteuse nga Yonderboi.

Për parfumin e saj të preferuar: M’u deshën disa vite të zgjidhja aromën time të preferuar, por që nga koha e qëndrimit në hotelin “Le Sirenuse”, në Positano, Itali, unë përdor Eau d’Italie nga Le Sirenuse. Edhe pse nuk është tepër femërore, prapëseprapë ka një aromë të freskët. Herë pas herë ndez qirinj aromatikë në zyrë, si Florio e Moro Dabron ose Ortigia, të cilët më ndihmojnë të përqendrohem, por edhe më japin rehati. Për ambientet që ju frymëzojnë: Gjatë fëmijërisë vizitonim muzeun Landskrona në Suedi. Vizitonim sa njërën dhomë tjetrën dhe vishnim veshje tipike të kohës dhe luanim rolin e ndonjë personazhi. Më pëlqente vërtet. Kohët e fundit, vizitova ekspozitën e bukur të artit dhe dizajnit të viteve 1920 të Swedish Grace, që ndodhet në Muzeun Kombëtar në Stokholm. U frymëzova vërtet nga ajo periudhë dhe dizajnuese si Anna Petrus. Më tërheq në veçanti arkitektura e brendshme e muzeve (është udhëtimi në kohë më i afërt). Prandaj më pëlqen muzeu Sir John Soane në Londër, Charleston në Suseks, në Angli dhe Svindersvik në Stokholm. Atje ndodhet një shtëpi e mahnitshme e quajtur “Villa Santo Sospir” në St-Jean-Cap-Ferrat [në jug të Francës]. Ajo u projektua nga Madeleine Castaing, por edhe Jean Cocteau i dha një dorë. Për fat të keq, ajo është mbyllur për qëllime rinovimi, por shpresoj që do të hapë edhe një herë dyert për publikun. Për të mësuarit: Kam lexuar librin Get Your House Right nga Marianne Cusato dhe Ben Pentreath. Ka të bëjë me detajet tradicionale të arkitekturës dhe kam mësuar shumë. Më ka ndihmuar ta kuptoj më mirë arkitekturën e një shtëpie.