Lavinya Stennett: Pionierja që futi çështjen e historisë së njerëzve me ngjyrë në agjendën arsimore
Hera e parë që e intervistova Lavinya Stennett, themeluesen e The Black Curriculum, lidhur me punën e saj për të transformuar sistemin arsimor britanik, ishte në nëntor të vitit 2020. Ai vit shënoi periudhën e trishtuar – pasojat e vdekjes së George Floyd gjatë pandemisë – dhe atë të lumtur – ajo sapo ishte shfaqur në faqen e parë të revistës britanike “Vogue”. Për një pjesë të mirë të bisedës sonë diskutuam lidhur me rëndësinë që ka pushimi për aktivistët; diçka që dukej veçanërisht e rëndësishme në një vit që ishte, siç e pranon edhe ajo, “emocionalisht rraskapitës”, për njerëzit me ngjyrë kudo. Megjithatë, Stennett dukej optimiste dhe e lumtur. Dy vite më pas, ajo mbetet e njëjtë, e dashur, gazmore, e orientuar drejt detajeve, e cila ka një dëshirë të zjarrtë për ta ndryshuar botën: “Nuk do të pushoj, derisa të gjithë të kenë qasje në arsim”.
Organizata The Black Curriculum (TBC) është krijuar për t’u siguruar që historia e britanikëve me ngjyrë të mësohet në të gjithën Mbretërinë e Bashkuar (MB). Stennett e themeloi TBC-në pas një udhëtimi në Zelandën e Re në vitin 2019, ku filloi të ndiente, ashtu siç ndodh me historitë indigjene, se “Historia e njerëzve me ngjyrë në MB nuk trajtohet me prioritet”. Në një raport të fundit u zbulua se vetëm 11% e nxënësve të arsimit të mesëm mësojnë rreth historisë së britanikëve me ngjyrë, dhe pa pasur njohuri të plotë, është e lehtë që të rinjtë të mendojnë se njerëzit me ngjyrë nuk janë pjesë e historisë britanike. Ashtu siç theksohet në faqen e saj të internetit: “Kur të rinjve nuk u mësohet historia e tyre... ndjesia e tyre e identitetit dhe përkatësisë ndikohen negativisht”. Prandaj, organizata ofron seminare në shkolla, konsultime për kurrikulën dhe programe për trajnimin e mësuesve të dedikuara për të frymëzuar historinë e britanikëve me ngjyrë në të gjitha shkollat e MB-së.
Në vitin 2020, pas rizgjimit të lëvizjes “Black Lives Matter”, TBC-ja u pranua nga të gjithë, por për Stennett ka ende shumë për të bërë. Deri më tani, qeveria britanike ka refuzuar të bashkëpunojë me TBC-në, pasi pretendon se kurrikula është mjaft e larmishme, por me debatet e vazhdueshme kulturore rreth racës dhe Perandorisë, është e qartë se vendimet e tyre ndikohen për shkak të frikës së politikave të “liberalizmit të padrejtë”.
Megjithatë, Stennett po përpiqet të nxisë gjithë klasën politike. “Është diçka me të cilën përballemi... ne zgjedhim atë që themi. Nuk do të përdorim fjalë të tilla si ‘dekolonizim’, sepse do të provokojë shumë njerëz që nuk arrijnë ta kuptojnë këtë. Do të përdorim terma të tjerë që shpjegojnë atë që po bëjmë”. Dhe planet e saj i kapërcejnë kufijtë e MB-së. “Është thelbësore që të përforcojmë edhe rrëfimet brenda historisë së njerëzve me ngjyrë në pjesë të ndryshme të Evropës, në Karaibe dhe në Amerikë. Ka ardhur koha që TBC-ja të ketë një shtrirje globale”.
Seun Matiluko është shkrimtare dhe studiuese britanike në fushën e drejtësisë, racave dhe politikës. Ajo ka shkruar artikuj për botime të ndryshme, duke përfshirë “gal-dem”, “The Independent” dhe “Glamour” dhe aktualisht është anëtare e “Frank Knox Memorial” në Shkollën e Drejtësisë të Harvardit, në Masaçusets.
