Marka parisiane e pajisjeve shtëpiake që na gëzon çdo ditë
Ndiheni të hutuar nga moda e shtrimit të tavolinës me dekore? Mos e mendoni më tepër se ç’duhet. Në vend të kësaj, investoni në disa shandanë qirinjsh prej qelqi të punuara me dorë me ngjyra të ëmbla dhe, le të themi, edhe në një set pecetash tavoline të qëndisura me rrepa, meritë e La Romaine Editions. Platforma digjitale e pajisjeve shtëpiake u themelua nga Parisienne Pauline Vincent, një blerëse e veshjeve për gra që u kthye në një blerëse e pajisjeve shtëpiake për qendrën tregtare franceze Galeries Lafayette në vitin 2021. Ajo e përdori lejen e saj të lindjes për të ngritur një biznes, pasi kuptoi që “nëse u përkushtohesh gjërave të përditshme e të zakonshme, jeta bëhet më e gëzueshme” gjatë confinement (termi në frëngjisht për “izolimin”).
“Ekspresive” është kryefjala për veprat e listuara në dyqanin e saj në internet që vijnë me motive me pika. Të parat vinin lulet dhe pastaj shandanët më të shitur të qirinjve në formë luledeleje nga artisja që jeton në Paris, Samantha Kerdine. Më pas, vinin të gjitha gjërat e kuqe, duke përfshirë vazon me nuanca në ngjyrë vishnje nga dizajnuesja Sophie Lou Jacobsen, një shoqe shkolle e Vincet që tashmë jeton në Nju-Jork.
Për pranverën e vitit 2022, la moisson ose “të korrat”, është tema për të cilën Vincet ka krijuar dizajne që përmbajnë një kalli gruri. “Ka për të qenë shumë i larmishëm”, – shprehet ajo e entuziazmuar. Për momentin, ajo po menaxhon shitjet e shumta të mbajtëseve të thikave risi në formë perimesh, të cilat i prezantoi në një darkë që organizoi në një restorant shumë të frekuentuar në Paris, “Mokonuts”. “Shita 50 kuti në një ditë!”
Ellie Pithers është një shkrimtare e pavarur dhe redaktore kontribuuese për British Vogue dhe që jeton në Paris.
