Kryekuzhinieri me një mision për ta vendosur kuzhinën irakiane në hartën e kulinarisë në Londër
Pas diplomimit nga kolegji dhe pas më shumë se pesë vitesh jo të kënaqshme duke punuar si financier, Philip Juma, pronari dhe kryekuzhinieri i Juma Kitchen, një restorant irakian që ndodhet në Borough Market të Londrës, e gjeti veten në kuzhinë. “Në rastin tim nuk ka asnjë histori prekëse në të cilën gjyshja ime më mësoi të gatuaja apo diçka të tillë, por gatimi ishte thjesht një shpërqendrim i këndshëm”.
I lindur dhe i edukuar në Londër nga një nënë anglo-irlandeze dhe baba irakian, Juma e filloi udhëtimin e tij të kuzhinës duke ngacmuar të atin me pyetje rreth ushqimeve që hanin në shtëpi. Ose, siç thotë ai, “duke e ngacmuar dhe i ngritur nervat”. Juma u rrit i rrethuar nga një kuzhinë me ushqime të tilla si kubba dhe dolma, dhe në fillim këto receta të familjes ishin e vetmja pikënisje. (Përpjekje të ndryshme për të fituar përvojë në restorantet irakiane në Londër rezultuan të pasuksesshme; “kuzhinierët ishin dyshues dhe hezitonin të ndanin njohuritë e tyre”, shprehet ai). Ky eksplorim i vetes dhe i identitetit të tij irakian ka qenë në qendër të gatimit të tij që nga dita e parë.
Që atëherë, Juma, si në nivel personal ashtu edhe sa i përket restorantit, ka qenë jashtëzakonisht i suksesshëm. Një nga finalistët në BBC Street Food Awards 2021, Juma e gjen veten në programin më të preferuar televiziv në Mbretërinë e Bashkuar Masterchef: The Professionals dhe Saturday Kitchen, ndër të tjera. Jo keq për një shpërqendrim që filloi në 2012 (i cili nuk pati kurrë ndonjë përfaqësim të llojit PR ose marketingu). Por në sytë e Juma-s, sjellja e kuzhinës irakiane në qendër të vëmendjes është arritja më e madhe, më shumë se çdo gjë tjetër në TV.
Shumë fansa të “Juma Kitchen” i dërgojnë mesazhe, duke e falënderuar për përfaqësimin e Irakut në një aspekt të kënaqshëm. Në janar të këtij viti ai vizitoi Irakun për herë të parë, duke e dokumentuar udhëtimin në Instagram, duke ecur rrugëve të Bagdadit dhe duke vizituar tregje dhe kisha – reagimet e njerëzve e befasuan vërtet. “Fëmijët e diasporës irakiane nga mosha 25 deri në 35 vjeç më kanë dërguar mesazhe, duke më thënë: ‘Vëlla, fjalët e tua më kanë mbetur në mendje’”, aq sa një djalë nga Australia i dërgoi një foto të biletës së tij të fluturimit për në Irak, duke e falënderuar që e inkurajoi të eksploronte rrënjët e familjes së tij. Sa i përket krizës së identitetit të Irakut, Juma e pranon me krenari se nëpërmjet “Juma Kitchen”, ai “po ndryshon retorikën”. Por historia e tij nuk ka të bëjë me hapjen e një restoranti apo botimin e një libri gatimi, të paktën jo tani për tani. Siç thotë edhe vetë: “Kjo shkon përtej ushqimit”.
Jake Missing jeton në Londër dhe është gazetar i kulturës, artikujt e të cilit janë botuar në revistat “Vogue”, “Noble” “Rot Magazine” dhe “Huck”. Ai është shkrimtari kryesor i “The Infatuation”
