Iman Le Caire: Aktivistja që po shpëton azilkërkuesit transgjinorë
Historia e fëmijërisë së aktivistes transgjinore të lindur në Kajro, Iman Le Caire, nuk është një histori vetëm pikëlluese. “Të panjohur, fqinjë, madje edhe pjesëtarë të familjes sime abuzonin me mua”, thotë ajo. Ishte shokuese që ajo u fajësua për këto abuzime. “Ata më konsideronin si fëmijë ‘mëkatar’. Ata mendonin se isha unë ajo që i tërhiqja njerëzit, sepse isha “femërore”. Në mënyrë të pabesueshme, ajo ka arritur ta përdorë këtë fillim të tmerrshëm në jetën e saj për të mirën e të tjerëve, duke themeluar Trans Asylias – një organizatë që ndihmon azilkërkuesit transgjinorë, shumë prej të cilëve po largohen për shkak të situatave të rrezikshme për jetën.
Vetë Le Caire u largua nga familja e saj kur ishte 15 vjeçe. Por situata e saj nuk ndryshoi brenda natës. Duke e përshkruar si “një kohë të tmerrshme”, ajo kujton se duhet të flinte tek miqtë e saj të tjerë “queer” dhe në rrugë. Gjërat filluan të përmirësoheshin kur ajo iu bashkua një kursi kërcimi në Teatrin e Operës dhe Baletit në Kajro dhe pas kësaj u bë kërcimtare dhe koreografe.
Mënyra se si fillova të fitoj para ishte nga “Krijimi i videoklipeve të këngëve për [këngëtaren marokeno-egjiptiane] Samira Said, dhe si rrjedhojë edhe jeta ime filloi të përmirësohej“. Megjithatë, dhuna, persekutimi dhe arrestimet për shkak të orientimit të saj seksual nuk ndryshuan. “Kishte kaq shumë ngacmime nga policia dhe kisha frikë”, pohon Le Caire. “Doja të largohesha [nga vendi] sa më parë”. Në vitin 2008, ajo u pajis me vizë turistike për të vizituar Nju Jorkun. Kjo ndryshoi gjithçka. “Kur po hyja në aeroport [në Kajro], pashë policinë dhe mendova se do të më arrestonin. Sapo avioni u ngrit nga pista, lëshova një zë të fortë – isha shumë e lumtur”.
Pas shkëputjes nga varësia e drogës si pasojë e traumës së shkaktuar nga e kaluara e saj, Le Caire tani lufton për të drejtat e transgjinorëve, e nxitur më tej edhe nga lëvizja “Black Trans Lives Matter” e vitit 2020. “U largova nga Kajro dhe erdha këtu, dhe çfarë po ndodh tani? Transgjinorët po vriten? Duhet të më vrasin më parë mua”, thotë ajo.
Le Caire tani ëndërron të ketë “një vatër shërimi” për transgjinorët, e cila do të përshijë jo vetëm doktorë dhe terapistë, por edhe një komunitet të dashur. “Atje”, thotë ajo me buzëqeshje, “ata do të kenë gjithçka që u nevojitet”.
Noran Morsi është gazetare e pavarur që jeton në qytetin e Nju Jorkut, e cila është me prejardhje nga Kajro. Ajo është kandidate për studimet master në artet e bukura pranë Universitetit të Nju Jorkut në programin e reportazhit letrar dhe bashkëgazetare në YouTube.
