Fuqia e ngjyrës rozë: Nuanca më e nxehtë e stinës

Roza është ngjyra e vitit 2023, duke shkruar përtej ciklit të zakonshëm të modës dhe dizajneve të brendshme në diçka më simbolike. Tradicionalisht, roza është ngjyra e feminitetit, e grave dhe vajzave, prandaj fakti që ka hyrë në modë në një kohë kur bota është gjithnjë e më armiqësore ndaj grave – në fillimin e një epoke post-Roe kundër Wade – duket mjaft mbresëlënës. Ndoshta kjo është arsyeja pse roza, që është në modë sot, nuk është nuanca delikate dhe e ëmbël e batanijeve për fëmijë ose e Peppa Pig. Është një ngjyrë që kërkon vëmendje.

Përveç Viva Magenta, ngjyra e vitit 2023 e Pantone, është edhe nuanca e Valentino Pink PP, e cila dominoi në të gjithë shfaqjen e koleksionit të pranverës së markës “Valentino” dhe që atëherë është paraqitur rregullisht në tapetin e kuq. Më pas janë nuancat e mjedrës së koleksionit të Molly Goddard dhe ngjyrat e ndezura nga koka te këmbët të Richard Quinn. Caroline Young, autorja e librit “The Color Of Fashion”, thotë se adoptimi i kësaj roze të ndezur mund të shihet si një mënyrë për të ngatërruar pritshmërinë rreth një ngjyre të lidhur me butësinë dhe pasivitetin. “Mendoni për fustanin që Molly Goddard veshi në Killing Eve. Është një ngjyrë e ëmbël, por e veshur nga një vrasëse psikopate”. 

Kjo teori vlen edhe për kapelat Pink Pussy që mbushën rrugët gjatë Marshimit të Grave të vitit 2017. Ose mendoni për kukullën Barbie, që zakonisht nuk shihet si pjesë e kauzës feministe, por një version filmik që do të shfaqet në korrik me Margot Robbie në rolin kryesor dhe me regji të Great Gerwig, e cila ka mundësi të sfidojë idenë se veshja rozë është sinonim i nënshtrimit.

Ishte Elsa Schiaparelli ajo që e futi rozën e ndezur në modë në vitet ‘30 dhe nuanca e saj “tronditëse” përdoret edhe sot nga marka. Që atëherë, ngjyra rozë e ndezur vazhdon të preferohet. Ishte fillimisht punk (Paul Simonon i grupit The Clash dikur tha: “Roza është e vetmja ngjyrë e vërtetë e rock ‘n’ roll”) dhe më pas, ndoshta ka pasur ose jo një kulturë ironike ose joserioze të udhëhequr nga Paris Hilton dhe miqtë e saj në fillim të viteve 2000, kur roza u bë pjesë e stilit të tyre. (Sigurisht që nuk është rastësi që roza është rikthyer në trendin e modës Y2K: Fuchsia Rose ishte në fakt ngjyra e vitit Pantone në 2001). 

Sot ngjyra rozë është po aq frymëzuese siç ka qenë gjithmonë. Stilistja e markës Shrimps, Hannah Weiland, e konsideron atë si nxitëse të gjendjes shpirtërore: “Mendoj se rrezaton ngrohtësi e gëzim dhe se një pjesë e mirë e ngjyrës rozë të jep një ndjesi lumturie të përgjithshme”. Georgina Huddart, stilistja e markës Hunza G, zbulon se rrobat e banjës ngjyrë rozë janë ndoshta një nga artikujt më të shitur të markës, sepse “kur vesh rozë ndihesh si dikush që po shijon jetën”. Dhe gjithashtu nuk i përket më vetëm një gjinie, gjë që ndoshta na ofron mënyrën më radikale për t’u veshur rozë. “Djali im, i cili është dy vjeç, vesh shpesh rozë dhe po e përdor gjithnjë e më shumë për të ngjyrosur”, thotë Weiland. “Ai e pëlqen sepse askush nuk i ka thënë se nuk është për të. Shpresoj që të mbetet kështu”.

Lauren Cochrane është shkrimtare me përvojë e modës për “The Guardian” dhe autore e librit The Ten