Daria Kaleniuk: Aktivistja ukrainase që lufton për sovranitetin e kombit të saj

Në fillim të marsit, kryeministri britanik Boris Johnson bëri një vizitë në Poloni ku u takua me homologun e tij polak, Mateusz Morawiecki. Ai ofroi mbështetjen e tij, ndërsa vendi përballej me krizën humanitare në rritje, për shkak të luftës në Ukrainë, por nëse ai shpresonte të paraqitej si burrë shteti gjatë fjalimit të tij, kjo la shumë për të dëshiruar. Dhe kjo ishte falë Daria Kaleniuk, një aktiviste ukrainase e pranishme në sallë. 

“Ndërsa ai po fliste, në telefonin tim po mbërrinin mesazhe nga një e afërme e cila po përpiqej të evakuohej së bashku me dy fëmijët e saj nga periferia e Kievit, ndërkohë që vendi po bombardohej”, thotë Kaleniuk. “Dhe përballë ndodhej Boris Johnson, i cili po thoshte se si populli ukrainas po frymëzon botën dhe se si ai po bën të pamundurën për ta ndihmuar, gjë që më bëri të ndihem e zemëruar dhe e tradhtuar”. 

Kështu, kur erdhi koha për të drejtuar pyetje, ajo mbajti një fjalim spontan që u bë viral, duke ndezur rrjetet sociale në mbarë botën. Ishte një kritikë me të cilën disa politikanë të nivelit të lartë rrallëherë përballen. Me zërin e saj plot zemërim, ajo kërkoi më shumë armë për popullin e Ukrainës dhe më shumë sanksione kundër oligarkëve rusë. “Thjesht u ndjeva se e kisha për detyrë t’i tregoja atij të vërtetën rreth asaj që po provojnë ukrainasit”, thotë ajo. 

Pasi përfundoi studimet për drejtësi në SHBA në vitin 2010-2011, Kaleniuk mund të kishte qëndruar dhe të bënte një karrierë të rehatshme. Por vendosi të kthehej në atdhe dhe në vitin 2013, së bashku me mikun e saj Vitaliy Shabunin themeluan Qendrën e Veprimit Kundër Korrupsionit (AntAC) dhe iu përkushtuan ekspozimit të aktiviteteve të paskrupullta të një pjese të madhe të qeverisë së Kievit në atë kohë. Pas protestave masive, që e detyruan presidentin e vendit të largohej në vitin 2014, shumë nga idetë e zyrës saj u shndërruan në ligj, duke e detyruar gradualisht Ukrainën që të bëhej më demokratike. 

Megjithatë, përballja me disa nga kundërshtarët më të pasur dhe të pushtetshëm në botë ishte një zgjedhje e vështirë. Në vitin 2020, shtëpia e Shabunin u dogj, ndërsa AntAC është paditur vazhdimisht. Por kjo ishte asgjë krahasuar me çfarë po përballen tani. Shabunin është duke luftuar pranë Forcave të Mbrojtjes Territoriale të Kievit, ndërsa Kaleniuk ndodhet në Varshavë, duke bërë thirrje për më shumë armë për Ukrainën dhe që NATO të vendosë një zonë ndalim-fluturimi për të sprapsur sulmet e ushtrisë së Vladimir Putinit nga kombi i tyre.

“Nuk jam më aktiviste kundër korrupsionit”, thotë Kaleniuk. “Tani ndodhem aty ku duhet të jemi për momentin, duke bërë çka mundem”.

Oliver Bullough është gazetar nga Uellsi që mbulon fushën e krimit financiar dhe ish-Bashkimin Sovjetik. Ai është autori i “Butler to the World” (Kryeshërbëtorja e Botës): Si u shndërrua Britania në shërbëtore të manjatëve, shmangësve të taksave, kleptokratëve dhe kriminelëve