Çfarë duhet të dimë rreth Bienales së Venecias
E gjithë vëmendja e botës së artit tani është tek edicioni i 59-të i Bienales së Venecias – ekspozita më e vjetër dhe, ndoshta, më prestigjioze e artit në botë. Pse është diçka kaq madhore? Epo, kjo ndodh çdo dy vjet, por, për shkak të pandemisë, ajo nuk u mbajt për një kohë të gjatë dhe, kështu, më në fund, ajo rikthehet këtë muaj.
Shpesh e njohur edhe me emrin “Olimpiada e botës së artit”, këtë vit Bienalja e Artit do të jetë e hapur nga data 23 prill deri në datën 27 nëntor dhe do të organizohet nga Cecilia Alemani, drejtoreshë dhe kryekuratore e parkut shumë të lavdëruar “High Line Art” në Nju Jork. Tema e këtij viti do të ofrojë perspektiva të reja dhe historike të shoqëruara me një tendencë surrealiste. Prandaj titulli – Qumështi i Ëndrrave (Il Latte Dei Sogni në italisht) – është frymëzuar nga libri për fëmijë i artistes Leonora Carrington, ku botët e reja imagjinare, ndërthuren me elemente të tjera shpirtërore.
Ky këndvështrim është më i theksuar, për shkak të pandemisë dhe mënyrave në të cilat jeta jonë ka ndryshuar; herë pas here, edhe përtej njohjes. Ekspozita kryesore do të përfshijë 213 artistë nga 58 vende të shpërndara nëpër gjithë pavijonet “Giardini” dhe “Arsenale” të Bienales, si dhe 80 pavijone kombëtare (disa shtete si Namibia dhe Uganda paraqiten për herë të parë në Bienale) dhe shumë ngjarje të tjera paralele në të gjithë qytetin e Venecias. Kështu që, nëse po planifikoni të vizitoni Bienalen këtë vit, këtu keni disa sugjerime:
- Dy artiste që kanë qenë në qendër të vëmendjes këtë vit janë Simone Leigh dhe Sonia Boyce. Ato janë artistet e para me ngjyrë që përfaqësojnë shtetet e tyre (përkatësisht Shtetet e Bashkuara dhe Mbretërinë e Bashkuar) në Bienale. Duhet me patjetër të shikoni veprat e këtyre artisteve që kapërcejnë kufijtë.
- Jashtë ambienteve formale të Bienales, ka ekspozita të shumta në të gjithë qytetin që ia vlen të eksplorohen. Pavijoni “Scotland + Venice”, që përqendrohet tek ekspozita Deep Dive (Pause) Uncoiling Memory e Alberta Whittle dhe ekspozita në grup e Parasol Unit Uncombed, Unforeseen, Unconstrained, është në qendër të vëmendjes së botës së artit, së bashku me shfaqjen e Danh Vo me Isamu Noguchi dhe Park Seo-Bo në Fondazione Querini Stampalia, dhe Louise Nevelson në Procuratie Vecchie.
- Vizitoni disa nga institucionet e arteve bashkëkohore të Venecias që janë të hapura gjatë gjithë vitit si ekspozitën Surrealism And Magic (“Surrealizmi dhe Magjia”): Enchanted Modernity (“Moderniteti i magjepsur”) në muzeun e arteve “Peggy Guggenheim Collection”. Fondazione Prada Venice do të shfaqë projektin Human Brains (“Truri i njeriut”).
-
Vetëm për hir të një atmosfere të këndshme, Caffè La Serra, që ndodhet afër Giardini në rrugën “Via Garibaldi”, duhet vizituar – ajo është një serë e shekullit të 19-të e ndërtuar për Bienalen e parë të artit në vitin 1894. Nëse doni të shijoni picat dhe pastat fantastike, vizitoni restorantin “Trattoria Dai Tosi” që mund të përshkohet edhe me këmbë nga Bienalia.
- Ka kaq shumë që mund të vizitoni, saqë do të kaloni më shumë kohë jashtë, sesa brenda; megjithatë, nëse kërkoni një hotel që ofron një përvojë tepër të këndshme veneciane, atëherë Ca Maria Adele është më i miri në qytet.
