Brendi i bizhuterive me përgjegjësi shoqërore që mban gjallë mjeshtërinë artizanale filipinase

Me rrezikun që i kanoset zejtarisë filipinase, Limnia po e promovon punën e këtyre argjendarëve anembanë botës dhe po u rikthen atyre besimin në të ardhmen e zanatit që kanë. “Besoj se filipinasit janë tejet të talentuar dhe kjo vërehet edhe më tepër kur largoheni”, thotë themeluesja Annette Lasala Spillane, e lindur dhe e rritur në Filipine, por që tani jeton në Nju Jork. Ajo bashkëpunon me TSKI, një organizatë jofitimprurëse filipinase që ka si synim zhdukjen e varfërisë nëpërmjet sipërmarrjes, për të ndihmuar artizanët teksa derdhin, rregullojnë dhe lustrojnë bizhuteritë. Falë modularitetit dhe një ndjesie rinovimi, pjesët Limnia janë krijuar që të duken gjithnjë të reja. Duke i përshkruar bizhuteritë e saj si “të lakueshme”, Spillane thotë, “Ideja është që një bizhuteri në fakt nuk është kurrë thjesht një bizhuteri”. Secili dizajn i përshtatet kreativitetit të personit që e mban, duke marrë çfarëdo forme që dëshironi. Varëset shndërrohen në vathë; gjerdanët në byzylykë dhe vathët në unaza. Fleksibiliteti i bizhuterive nxjerr në pah konceptin e rinovimit – i jep mundësi përdoruesit që bizhuteritë e tij t’i duken përsëri si të reja.