Amapiano: vala e re e muzikës “House” afrikano-jugore që po merr famë globale
“Amapiano për botën!”
Po përmbushet shprehja profetike e ndjekësve të devotshëm të këtij zhanri bashkëkohor afrikano-jugor të muzikës “House”. Aktualisht, amapiano po kalon përtej kufijve të saj të origjinës në qytezat e Joburgut dhe Pretorias. “Ama” është fjala në gjuhën zulu për shumësin e fjalës “piano”. Pra, piano. Shumë të tilla. Siç tregohet nga emri i saj dygjuhësh, zhanri është një përzierje ndikimesh ku ndërthuren “Kwaito” (një zhanër i muzikës “House” afrikano-jugore me ritëm të moderuar) dhe “Bacardi” (një nënzhanër i muzikës “House” pretoriane me ritme të forta) me melodi në piano që mëshojnë nga rryma xhaz. Këngët amapiano janë zakonisht rrugëtime të gjata zigzage që arrijnë të paktën në një pikë kulmore, një rënie, një ndryshim të ritmit, një melodi të re dhe ndonjëherë përfshijnë të gjitha këto më sipër.
Amapiano është bërë i njohur në të gjithë Afrikën e Jugut që nga viti 2016, por tashmë po përhapet në rang global. Yam Carnival 2020 në Londër kishte një tendë të dedikuar për të dhe Fat Joe theu rrjetin në Twitter, duke ndjekur ritmin e këtij zhanri. Llogaria danceagram_sa në Instagram që u dedikohet videove të njerëzve që kërcejnë muzikën “House” afrikano-jugore (më së shumti amapiano) ka arritur më shumë se 200 mijë ndjekës. Gjithashtu, sfida virale në TikTok #DakiweChallenge përmbante grupe miqsh që dëshironin të rikrijonin lëvizje kërcimi të ngjashme me ato të “Matrix”.
Anëtarët besnikë të komunitetit të muzikës amapiano kanë luajtur një rol kyç në përhapjen e saj. Ata janë DJ Mahporisa, një producent (sjellim ndërmend Wizkid, Drake dhe Major Lazer) dhe përfaqësuesi i muzikës “House” afrikano-jugore, Kabza de Small (që e identifikon veten si “Mbreti i Amapianos”), Mr JazziQ (ish-pjesëtar i dyshes JazziDisciples) dhe Vigro Deep.
Ka edhe DJ, që shpesh janë personalitete me ndjekës nga i gjithë globi, të cilët kanë perfeksionuar kombinimin e miksimit dhe performancës. Nuk është diçka e pazakontë të shohësh Major League DJz, vëllezërit binjakë që do të jenë yjet të cilët do të performojnë albumin Pianochella në O2 Academy Brixton në Londër në maj të vitit 2022, duke u ngjitur si akrobatë në podiumin e tyre teksa performojnë dhe shijojnë energjinë e turmës. TxC është dyshja e binjakeve DJ, stili, performanca dhe kërcimet në sinkron të të cilave kanë tërhequr vëmendjen e turmave nga Lagosi deri në Dar es Salaam dhe Maputo. Po, njerëzit vijnë për të dëgjuar, por edhe për të parë.
Ndërsa amapiano ka kapërcyer kufijtë, edhe ka evoluar. Pop-i afro-nigerian e ka përdorur tashmë këtë tingull, duke e tjetërsuar disi dhe duke e bërë më goditës (dhe po, më të shkurtër, për një audiencë që nuk ka durim për ritmet që shtohen). Mirëpo, puristët janë të përkushtuar të ruajnë origjinalitetin e saj, pasi siç e thotë dhe DJ Maphorisa: “Nëse nuk na përfshini, nuk është amapiano”.
5 këngë amapiano për t’i shkarkuar tani:
- Adiwele, Young Stunna ft Kabza de Small
- Blue Skies, Mr JazziQ & JazziDisciples ft Vigro Deep & Rams de Violinist
- Nkao Tempela, Ch’cco ft Mellow & Sleazy
- Superman, DJ Stokie ft Kabza de Small, Masterpiece YVK, Madumane
- Macnose, JazziDisciples
